काठमाडौं । नेपाल एसोसिएसन फर सफ्टवेयर एन्ड आईटी सर्भिसेस कम्पनीज (नास-आईटी) ले नेपाली सूचना प्रविधि (आईटी) उद्योगलाई अन्तर्राष्ट्रिय बजारसँग जोड्ने उद्देश्यले ‘नेपाल टेक रोडशो यूरोप (यूके र स्विट्जरल्यान्ड) २०२६’ आयोजना गर्ने भएको छ ।

नास-आईटीका अनुसार रोडशो आगामी भदौ २१ गतेदेखि असोज ५ गतेसम्म बेलायत र स्विट्जरल्यान्डमा सञ्चालन हुनेछ । कार्यक्रममार्फत नेपाली आईटी कम्पनीहरूलाई यूरोपका व्यवसाय, स्टार्टअप, लगानीकर्ता, इनोभेसन हब तथा गैरआवासीय नेपाली (एनआरएन) प्रविधि समुदायसँग जोड्दै नयाँ व्यावसायिक साझेदारी, प्रविधि निर्यात र वैदेशिक लगानीका अवसर विस्तार गर्ने लक्ष्य राखिएको छ ।

यो कार्यक्रम स्विस सरकार विकास सहयोग (Swiss Agency for Development and Cooperation), नेपाल इन बिजनेस-ग्रोथ एडभाइजर्स कार्यक्रम तथा यूके इन्टरनेसनल डेभलपमेन्टको सहयोगमा दाई ग्लोबल यूकेले कार्यान्वयन गर्नेछ ।

नास-आईटीले यसअघि सन् २०२५ मा अष्ट्रेलिया र सन् २०२६ मा अमेरिकामा सफलतापूर्वक आयोजना गरिएका नेपाल टेक रोडशोको निरन्तरतास्वरूप यसपटक यूरोप संस्करण आयोजना गर्न लागिएको जनाएको छ ।

आयोजकका अनुसार यसले नेपाली आईटी उद्योगलाई यूरोपेली बजारसँग प्रत्यक्ष जोड्दै अन्तर्राष्ट्रिय सहकार्य विस्तार गर्न महत्वपूर्ण भूमिका खेल्ने अपेक्षा गरिएको छ ।

रोडशोको पहिलो चरण सेप्टेम्बर ६ देखि १२ सम्म बेलायतमा सञ्चालन हुनेछ । यसअन्तर्गत मुख्य कार्यक्रम सेप्टेम्बर ९ मा लन्डनस्थित रेडिसन ब्लु होटल लन्डन हिथ्रोमा आयोजना हुनेछ ।

कार्यक्रममा नेपालको आईटी उद्योगको वर्तमान अवस्था, सम्भावना, नेपाली कम्पनीहरूको क्षमता, अन्तर्राष्ट्रिय अनुभव तथा व्यावसायिक सहकार्यका अवसरबारे प्रस्तुति र अन्तरक्रिया गरिनेछ ।

त्यसपछि रोडशोको दोस्रो चरण सेप्टेम्बर १३ देखि २१ सम्म स्विट्जरल्यान्डमा आयोजना हुनेछ । यसको मुख्य कार्यक्रम सेप्टेम्बर १६ मा ज्यूरिखस्थित होटल सेन्ट गोडार्डमा हुनेछ ।

रोडशोका क्रममा सहभागी नेपाली कम्पनीहरूले यूरोपका व्यवसायिक संस्था, सम्भावित साझेदार, स्टार्टअप, इनोभेसन हब तथा अन्य सरोकारवालासँग प्रत्यक्ष भेटघाट, व्यावसायिक छलफल र नेटवर्किङ गर्ने अवसर प्राप्त गर्नेछन् ।

नास-आईटीका अनुसार यसबाट नयाँ साझेदारी, सेवा निर्यात विस्तार, वैदेशिक लगानी आकर्षित गर्ने तथा दीर्घकालीन अन्तर्राष्ट्रिय सहकार्यका आधार तयार हुने अपेक्षा गरिएको छ ।